Poslovne vijesti - Makedonija

Преку Кожуф Македонија сериозен конкурент во светскиот туризам!

Во полн ек се градежните активности за изградба на регионалниот пат Коњско - Кожуф во должина од 17,5 километри.

Делницата води кон ски-центарот Кожуф и со изградбата ќе се зголеми безбедноста на туристите кои патуваат кон Кожуф. Досега тие беа принудени да патуваат по технички пат.

Изграден е мост, а патот, кој е предвидено да има две коловозни летни, се покрива со асфалтен слој.

Работниците на Гранит", кои работат на теренот, се оптимисти и очекуваат дека патот ќе биде готов пред предвидениот рок од 18 месеци.

Ангел Наков, директор на Кожуф" потврдува дека патот отсекогаш бил проблем за туристите.

- Почнавме во 2007 година, но светската економска криза предизвика намален интерес за инвестирање. Сепак, очекуваме дека многу скоро ќе се изгради патот и ќе биде пуштен во употреба. Ова е редок пример државата да му дава поддршка на приватниот бизнис - вели Наков.

Регионалниот пат Коњско (Смрдлива Вода) - Кожуф со должина од 17,4 километри почна да се гради кон почетокот на март, а камен-темелникот го поставија вицепремиерот и министер за финансии, Зоран Ставрески, и директорката на Агенцијата за патишта, Наташа Волкановска.

Седумнаесетте километри модерна инфраструктура треба да придонесат Македонија силно да конкурира во туризмот преку ски-центарот Кожуф", но и да ја поттикне економијата на околните општини, како Кавадарци, Неготино, Демир Капија и на осумдесетина села.

Првите луѓе на ски-ресорот велат дека економските придобивки од државната инвестиција вредна седум милиони евра ќе има за целиот регион и за имиџот на Македонија, но и дека дел од нив се видливи само со најавата дека се гради регионален пат. Во овој ски-центар има и странски инвестииции од земјите на ЕУ и соседна Грција.

Ски-центарот Кожуф" претставува една од најголемите приватни инвестиции во Македонија. Според најавите на менаџерите полниот капацитет на центарот треба да овозможи да се отворат околу 1000 работни места, а уште над 3000 да се ангажираат од придружните индустрии. Оттука и изградбата на регионалниот пат Р112 во буџетот се води како капитална инфраструтурна инвестиција. Проектот е дел од планот на Владата за обнова на патната мрежа на државата. Со изградбата на овој патен правец, покрај тоа што се поврзуваат два региона, се воспоставува и директна врска меѓу општината Гевгелија и скијачките терени на Кожуф.

Надлежните институции сметаат дека реализацијата на проектите од овој вид, чија цел е подобрување на транспортната инфраструктура, се меѓу основните за развој на туризмот, одржлив економски раст и подобрување на животниот стандард на граѓаните.

Директорот на ски-центарот Кожуф", Наков, во неколку наврати веќе укажа дека со изградбата на овој регионален пат се отвора најголемото богатство на Македонија на светскиот туристички пазар.

Во последната зимска сезона ски-центарот Кожуф" им понуди на туристите 26 апартмани кои се наоѓаат на влезот во населбата. Секој од апартманите се простира на широчина од 30квадратни метри, вклучува бања и кујна со мини бар и легла за 4 лица. Сите апартмани имаат подно греење.